სოციალურ ქსელებში ვირუსულად ვრცელდება ტელეკომპანია TMC-ს გადაცემაში Quotidien გასული სიუჟეტი, რომელშიც ჟურანლისტი ევროპარლამენტის შენობაში მომუშავე პოლიტიკოსებს ახლო აღმოსავლეთის რუკაზე ირანის ჩვენებას სთხოვს.

გამოკითხულ პოლიტიკოსებს შორის, რომლებსაც ამ ამოცანას თავი ვერ გაართვეს არიან: საფრანგეთის ევროპის საკითხებში მინისტრი ბენჟამენ ჰადადი, ევროპარლამენტარები ფაბიენ კელერი, მარი ტუსენი, დავიდ კორმანი.

თუმცა ზოგმა პოლიტიკოსმა დავალება შეასრულა. მათ შორის არიან ჟორდან ბარდელა, რაფაელ გლუსკმანი, ნატალი ლუაზმო და მანონ ობრი.

„ეს შეცდომები სასაცილო იქნებოდა, ევროპარლამენტს რომ არ უწევდეს პოზიციის დაკავება მიმდინარე ომთან დაკავშირებით... ახლა უკვე უკეთ მესმის, რატომ არიდებს ზოგიერთი თავს მის დაგმობას!" - დაწერა ობრიმ სოციალურ ქსელში.